شر البلية مايضحك .. فكثيرا ما تسوق لنا الحياة قصصا غريبة ومثيرة والمدهش أن بعضها يرتبط بمواقف صعبة مثل الموت تولد من رحمها الطرائف التى تصل الى الضحك والبكاء فى وقت واحد .
والقصة التى بين ايدينا من نفس هذه النوعية ويحكيها لنا أحد شهود الواقعة ويقول "إمبارح كان فيه جنازة ، بعد الجنازة ما خلصت باليل الناس جابوا النعش الفاضى وحطوه قدام باب المسجد ، واحد من أهل المنطقة نزل المسجد الساعة 3 الفجر علشان يصلي ركعتين قيام ليل .. ملقاش عامل المسجد خالص قعد مستني شوية ، لقي الجو برد وكان هو مخفف راح طالع فوق النعش وفتحه ودخل نام جواه .
ويكمل "متعرفش إزاي جاله قلب ينام جوه؟ عم عاطف عامل المسجد جاء و فتح المسجد وشغل إذاعة القرآن الكريم . وبدأ يجر النعش لوحده جوه المسجد مسافة قريبة جدا والارض سيراميك فساعدته على جره بسهوله وصاحبنا نايم فى ملكوت الله وعم عاطف اصلا سمعه تقيل لغاية لما دخل النعش فى مكانه ناحية القبلة متطرف أقصي اليمين .
عم عاطف أقام الصلاة حظي جه فى إني واقف قصاد النعش علي طول . كنت واقف وجنبي راجل فوق الخمسين سنة ناحية اليمين ، وواحد شاب قدي فى العمر ناحية الشمال . الإمام قرأ الفاتحة وأنا بأمن ، الواد اللي جنبي حس إن النعش بيتحرك ، وكان الامام لسة بيكبر تكبيرة الإحرام بصلي كدة وقلي : " الحق النعش بيتحرك " أنا مقدرتش امسك نفسي من الضحك . قطعت الصلاة وقلت لية " أنت أهبل يالا ؟!! كبرنا تكبيرة الإحرام وعمك الإمام بيقرأ فى سورة النجم .
فجأة لقيت النعش بيتحرك وواحد بيرفع الغطا تخيل إنت بتصلي ولقيت واحد طالع لك من النعش وبيفرك فى عنية وبيتاوب وبيبصلك ويقولك " هو انتوا أقمتوا الصلاة يا بشمهندز؟" الراجل اللي كان ناحية اليمين وقع علي الأرض من الرعب ، أنا جريت من المسجد حافي ، والواد اللي كان بيصلي جنبي ناحية الشمال بيجري ورايا حافي هوا كمان . أنا وصلت بيتنا فى زمن قياسي وطول الطريق عمال أقرأ الشهادتين . الواد كمل الطريق وهو علي لسانه " يا جدعان ... الراجل طلع من النعش ، ده انا اول مرة أصلي الفجر فى حياتي يا ولاد الكلب" وكمل جري وهو حافي انا أول ما دخلت البيت قفلت جميع الشبابيك والابواب والحاجة بتقولي ايه يازفت بتوع داعش بيجروا وراك قولتليها اه ونزلت تحت البطانية ومسكت المصحف .
