انا كنت ارملة 10سنوات وعندي بيت وليا بنت وولد أراد الله بعد الفتره دي اني اتجوز من أحد مدرسين ابني هو مطلق وله ولد وانا أكبر منه بكذا سنه سيبت البلد ال كنت فيها وقعدت معاه قي شقته بس والدته قالتلي أن دي شقه ابنه يعني بالمحسوس كده احنا ضيوف لحد ما الولد يكبر وافقت ووافقت كمان ميكونش فيه قايمة وجبت من عفشي اللي يكمل الشقه.
طلبوا مني عدم الخلفه وقالوا ولادك وابننا كلهم اخوات وافقت وقولت خير انا كمان مش حمل عيال لاني عانيت في تربيه ولادي لوحدي ونفسي ارتاح انا كنت بشتغل وليا معاش من زوجي السابق ووالدي بس طبعا كله أتوقف عشان جوازي والمعاش لأولادي بس الحمد لله كان طول السنين اللي فاتت زوج محترم وبيعامل ولادي هو وأهله كويس والحمد لله واحنا كمان بنراعي ربنا في تعاملاتنا معاهم وابنه زي ابني مع انه بيروح ويجي من عندنا لمامته .
حاليا بقالنا ٤ سنين متجوزين، جوزي بقاله فتره بيقنعني انه يتجوز واحده يكون عندها إمكانيات ماديه كويسه يحسن بيها مستواه لأنه مدرس تربيه رياضيه ومش عارف يعمل اي مستقبل لابنه وانا الصراحه رافضه وخيرته بيني وبين جوازه قالي انتي نعم الزوجه بتراعي ربنا فيا وفي أهلي حتى وقت إصابتهم بكورونا متاخرتش عنهم وكنت سابقه ولادهم في الأكل والعلاج وكل شيء وده واجب عليا لكن والدته توفت رحمها الله ووالديه ربنا العالم بعامله زي والدي .
وحاليا عايز يخلف ونفسه يلعب مع طفل بيقولي العب معاه بس مش قد مصاريفه فبيفكر يشوف واحده عندها القدره الماديه والصحية لاني رافضه اخلف لاني تعديت الـ٤٠ واخاف من الحمل هو اصلا مش بيقعد في البيت الا قليل دايما بره مع أصحابه وهو قالي من الاول هو وأهله أن ده طبعه فكنت بسيبه يخرج براحته في أي وقت في اليوم المهم يرجع كويس وكان بيقعد يحكيلي يومه وبكلمه وهو بره وأطمن عليه لغاية اما يرجع بس انا عارفه ان كلنا عيوب بس هو دايما ساخط على الوضع وعايز يعيش في مكان تاني وبدأت المشكله من الحاحه في الجواز مع تمسكه بوجودي وقالي بعدما ترك البيت 14 يوم كنت بموت فيهم وجالي سكر واخيرا بدأ يرد عليا وقالي راجع بس لما نفسيته ترتاح المهم رجع وبدأ باعتذار لما شاف منظري بس انا كنت ساكته كان هيمشي تاني لكن اتكلمت وقالي انه رهن عربيته عشان يسافر ووقف ده كله عشاني وكلام زي كده وأنه اتنصب عليه في نص المبلغ اللي دفعه ومن هنا لهنا بيكرر موضوع السفر مع ان والده عيط عشان بعده عنه لكنه راجع بعد الغيبه دي عنده برود وده مش طبعه وبيلح عليا وانا قولتله لو مصر شوف حياتك من غيري و شكيت انه عرف واحده تانيه واتكلمت معاه كان بينكر وبعدين قالي انه بيكلم واحده من فتره قصيره واتفق معاها على جواز هي مطلقه ومش هتغرمه شيء وبتشتغل في بنك وقالها عني وأنه متمسك بيا وهي موافقه والفترة اللي ساب البيت فيها كانت خروجات وصرف ورهن العربيه وتقريبا على حد كلامه لما قولتله جالي سكر قفل معاها ودور على سفر وعمل مقابله وجاي يقنعني انه يسافر يجرب حظه.
والله مش بفتري عليه لكن هو مش بيعمل حاجة غير شغله في المدرسه لأنه كسول ومسرف جدا جدا والعربيه ال كان هيبعها دي لسه عليها فلوس لأصحابه من حقها وانا بعت دهبي الخاص بيا انا عشان يكمل تمنها وقولت اللي يسعده يسعدني حالا انهرت لما عرفت بالمطلقه دي وصعبت عليا نفسي اوي وقولتله مفيش لك أمان بكي وقالي ليكي حق في كل شيء انا كنت مغيب والشيطان ضاحك عليا ولقيته كاتب على نفسه وصل امانه للرهن العربيه ومش عارف يعمل ايه .
قالي نبدأ صفحه جديدة وربنا غفور رحيم طبعا بعدما انهرت وكنت تقريبا مع الأموات انا بحبه هو إنسان خلوق لكن شيطانه ضحك عليه هو والمطلقه اللي استغلته حسبي الله ونعم الوكيل في كل واحده تقصد وتسعى لخراب البيوت انا كنت ارمله 10سنين جالي فيها كتير عمري م سمحت لنفسي اني اقهر زوجة أو اخرب بيت لكن مش كل الناس زي بعضها.