مبيعرفشى، وأنا مالى، ذنبى فى كده إيه؟، أنا واحدة كان كل أملى فى الحياة إنى أعيش مستورة بين 4 حيطان، أربى عيالى فى أمن وستر وخلاص، ولا كان فى بالى أى حاجة تانية، وسمعت كلام أمى واتجوزت اللى قالتلى إنه هيعينى فى هنا وسعادة، لكن للأسف أدينى بدفع التمن، والستر اللى كنت بتمناه وبدور عليه فى كل وقت اتقلب لفضيحة والكل بقى عارف بحكايتى .. بهذه الكلمات جلست «جيهان» تروى تفاصيل مأساتها مع زوجها أمام محكمة الأسرة، حيث أجهشت بالبكاء المتواصل، وملأت الدموع وجهها، حتى أوقفها البكاء عن الحديث، وكشفت أن زوجها كان يعانى من مرض نفسى وأن أسرتها أرغمتها على الزواج منه ولكن بعدما تزوجته اكتشفت أنه يعيش فى دنيا غير الدنيا، فهو لا يعرف الحب ولا يعرف معنى الزواج، وبعدما كانت ترغمها أسرتها على الصبر، ضاقت وقررت ألا تصبر على المجهول، وعندما طلبت الانفصال عارضها الجميع فى أسرة الزوج فقررت اللجوء إلى المحكمة آملة أن تحصل على ورقة حريتها.
وعلى طريقة الفيلم الكوميدى محامى خلع، مع اختلاف طبيعة الأحداث، سأل القاضى الزوجة الشابة، ليه بتطلبى الخلع يا جيهان؟
فأجابته ووجهها تنظر فى الأرض خجلا: أصله مبيعرفشى يا سعادة البيه، مبيعرفش يحب، مبيعرفش يكره، ده طفل صغير وعنده حالة نفسية، بدل ما كانوا يجوزوه كان يعالجوه أفضل.
فعاود القاضى سؤالها، وهل حاولت إصلاح أمره أو اللجوء لأحد من أفراد أسرته؟
فردت عليه: والله العظيم يا بيه كلمت طوب الأرض، علشان يعرفوه حاجات كتيرة فى الدنيا لكن لا حياة لمن تنادى، يا سعادة البيه أنا طول عمرى كنت بحلم بالستر وإن محدش يعرف عنى أى حاجة، وحلمى كان بسيط أوى، أتجوز واحد يحافظ عليا ويصون عشرتى، ولما اتجوزت كانت الأزمة وسيرتى بقت على كل لسان، بمشى فى الشارع والكل عمال يلسن عليا، رجال وستات، وأنا سامعة، ده يقول للتانى تلاقيها ماشيه فى الحرام والبطال، الكل كان باصص لجسمى وأنوثتى الزائدة، ومحدش كان مقدر قيمة الألم النفسى اللى الكل كان سبب فيه.
فعاود القاضى سؤالها: يعنى مفيش فايدة يا جيهان للصلح؟
فأجابته: صلح إيه يا سعادة البيه، أنا بنى آدمة نفسى أعيش حياتى، أحب واتحب، مش أحب وبس، دى الحياة خد وهات، يعنى العلاقة متبادلة، نفسى ألاقى حد يسترنى مش يكون سبب فضيحتى فى الرايحة والجاية.
فقام القاضى بسؤالها، يعنى مفيش حل غير الخلع؟
فقالت جيهان، أيوه سعادتك، اعتبرنى بنتك، أو أختك الصغيرة، أظن بعد اللى أنا حكيته ده كله لو أنا رجعت تانى يبقى العيب فيا أنا مش فى حد تانى .
فأصدر القاضى قراره بشأن القضية، وتم حجزها للحكم، فى أوائل شهر أبريل، فأطلقت الزوجة الشابة التى كانت تبكى زغرودة قائلة الحمد لله كده هعيش حياتى بقى.
