واحد قريبي المفروض أنه متدين ومتشدد كمان ، دائما يحرضني علي الطلاق من جوزي ، أنا جوزي كانت ظروفه المادية كويسه جدا وحصله ظروف وخسر كل الفلوس اللي معاه وبقي عاطل ومش راضي يروح يشتغل عند حد ولما اقوله ليه مش عايز تنزل شغل يقولي بعد ما كنت مدير نفسي اشتغل عند حد يتنطط عليه.
أصبح عاطل أبوه بيساعدنا وابويا كمان وقاعدين في شقه ملكنا والدنيا ماشيه.
قريبي ده كل ما يشوف وشي يقولي أطلقي انتي لسه صغيره والدنيا قدامك يمكن ربنا يرزقك بزوج كويس ، ويفضل يقولي جوزك ده انا لا أحبه مع أن جوزي اصلا مابيتكلمش معاه خالص ولا بيشوفه لأن جوزي طول الوقت قافل اوضته عليه ومابيكلمش حد ، أقوله أنا لو أطلقت مش هتجوز تاني.
أنا بشتغل يومين في الاسبوع وبساعد شويه في المصاريف وانا راضيه عشان جوزي بصراحه محترم ومؤدب وعمه ما زعلنى ولا مد إيده عليا ، هوه بس عدم السعي للرزق هوه عيبه الوحيد.
قريبي ده انا بشوفه يومياً يعني مضطرة أتعامل معاه لأننا في بيت واحد ، أحاول عدم التواجد في المكان اللي هو فيه منعاً إني اسمع منه كلمة تضايقني ، بس أنا بزعل لما بيتكلم علي جوزي كلام وحش وببقي مش عارفه أرد غير اني أقوله مالكش دعوة ، هو في حاله وأنت في حالك ، ايه اللي مضايقك أنه يشتغل أو لأ وأكون نفسي اقول كلام أعنف وأقسي من كده بس بتكسف أحرجه.
أنا مضايقه يا جماعه أنه ديما بيتكلم علي جوزي وحش ويفضل يقولي انه بيكرهه وبستغرب ليه بيكرهه للدرجه دي وهوه لا يتعامل معه ولا جوزي بيشوفه ولا في تعامل بينهم.
والله هتجنن ليه شخص يكرهه شخص لهذه الدرجة ومش عارفة طريقة أتعامل معاه بيها لو جاب سيره جوزي تاني.
