عمل عملية في صدره علشان يبقي أمور

مش عارفه اتصرف ازاي واعمل ايه، انا متزوجة وعندي طفلين 3سنين وسنة، متزوجة عن حب وكنت بحبه جدا والله شاهد علي كلامي وكنت مستعدة اعمل كل حاجه عشانه بس للاسف بمجرد ماتجوزنا وكل شئ بدأ يظهر علي حقيقته، دايما بيدور علي غيري ودايما يبحث علي بنات من برامج تواصل، الاهم ان اخر مره عمل كدا هو لسة عامل عملية أي لزوم، عمل عملية التثدي عشان الجيم وكل ماحد يسأله يقول عشان لما اروح المصيف يبقي شكلي حلو محدش يبصلي وحش، قلتله ليه هو الرجالة هتبص علي صدرك ولاقصدك بقي البنات يتهرب من الكلام.
والمشكله انه مش تخين ولاصدره بشع دا كان تثدي درجه اولي وكمان مش باين خاااالص، ماعلينا بقيت انزل مكانه في الشغل هو شغل خاص بينا وشيلاه وشايلة همه وهم العيال والشقة والتنضيف وف الاخر لقيت كل التقدير والاحترام بصراحة بمسك تليفونه لقيته بيخوني زي عادته ومنزل تطبيقات تواصل مع بنات تطبيقات كتيره جدا ولما واجهته قلي انا حر ملكيش دعوه قلبي وجعني جدا، شتت أحاسيسي مبقتش عارفه اعيط ولا أدمع حتي جوايا صرخه نفسي اطلعها مش عارفه مبقتش اعرف اعيط علي أي حاجه ايا ان كانت حتي لو موت شخص عزيز علي، المهم طلبت الطلاق ورفض ومن هنا قعد يصالح ويبرر بس مقتنعتش انا كرهاااااه جوايا حاجه مش متقبلاه اطلاقا كمان بيعاكس قدامي وبيدوس علي كرامتي بأفعاله بعزم ماعنده، كارهه نفسي وحياتي معاه، هتقولوا ليه خلفتي اتنين التاني كان ارادة الله الحمل حصل علي اللولب غصب عني ، ندمانة علي اللي وصلتله، مش عارفة حتي اتصرف ازاي ، بحس انه عمره ماحبني ولا شافني حلوة هز ثقتي في نفسي جدا خلاني مليش نفس اكل ولا أشرب ولاحتي اشوف نفسي في المراية اصبحت اكلم نفسي في صمت كل يوم هل أنا وحشة ومتحبش وليه متحبش ليه؟!! أنا مش ملكة جمال أنا انسانه طبيعية جدا وشكلي حلو مش وحش يعني وجسمي كويس مناسب لطولي جدا بعمله كل حاجه والله لبس ودلع وكل حاجه ليه هو كدا، هتجنن عقلي هيطير، والمفروض يعقل هو 27 سنة واب لطفلين ليه يخرب البيت الي عماله احافظ عليه عشان عيالي ما بقيتش باقيه عليه لحظه !