نفسي ارجع أثق في نفسي تانى

كل ما أتمناه انى ارجع اثق في نفسي تانى و مش عارفة من 5 شهور كنا فى جروب بنتكلم فيه انجلش كممارسة و اتعرفت فيه علي شخص من وجهة نظرى محترم جدا و انا مشوفتوش قبل كدة بس ال جذبنى ناحيته انه تقريبا كل حاجة كانت شبهى في الشخصية.
الموضوع استمر 3 شهور كل يوم بنقرب اكتر و هو كان بيلمح بمشاعر و انا تجاهلتها لانى مش متخيلة ان في علاقة ممكن تبدأ و تستمر و تنجح بدأت اونلاين .
وفي مرة طلب اننا نتقابل و ساعتها كان ردى ان انا مش شايفة ان في داعى للمقابلة طالما مفيش سبب وجيه ، و طبعا زعل و انا لم أحاول اسال زعلان ليه.
عدى اسبوع و هو مبعتش تانى و في نفس الوقت اتقدم عريس صالونات و صليت استخارة و وافقت لان حسيت ان دا الصح و انا جاية على مشاعرى لانى كنت بالفعل متعلقة بيه بس قولت اكيد ربنا ليه حكمة ف كدة و ربنا بيبارك ف الحلال.
قبل ما نقرأ الفاتحة و محصلش نصيب عشان الاتفاقات ساعتها تعبت نفسيا جدا و روحت لمعالج نفسي و قالى عشان تنسي حاجة لازم تسدى اى سبيل يفكرك بيها و ان اللي عملته صح و طلب منى اعمله بلوك عشان ما يبقاش في تواصل تانى.
حاولت اجاهد مع نفسي لحد بقيت احسن شوية ..بعدها في عريس تانى اتقدم و المفروض انه ملتزم و طلب منى ألبس نقاب ووافقت رغم ترددى بس بعد الجواز اعتبرتها شئ لله لكن اتفاجات انه عمال يقولى كلام حب بشكل غير طبيعى و لو سبتله الفرصة هيقول كلام جرئ و هو اصلا مشافنيش غير 3 مرات ، استنكرت كلامه و حسيت انه شخص متناقض و مش ملتزم ولا حاجة مكملش اسبوع و لقيته بيتصل بيفك قراية الفاتحة بدون اى مقدمات بالرغم من انه كان لسه قبلها بيوم بيسال احط الشاشة فين و السبب ان انا رافضة النقاب و دا مش حقيقي بصراحة حسيت انى أخذت صدمة فى كل حياتى من كل واحد اتعرفت عليه ، حاسة ان فيا حاجة غلط مبقاش عندى ثقة في اى حد ممكن يدخل حياتى او انه يكمل خصوصا انى شخصية انطوائية شوية و مش بكسب العلاقات بسرعة .